१७ वर्षीया गायिका आस्था भण्डारी गायनमा करिअर बनाउन चाहन्छिन्

सानैदेखि संगीतमा रुचि राख्ने आस्था भण्डारीले एक वर्षअघि नै आस्था नामक एकल एल्बम श्रोतामाझ ल्याएकी थिइन् । सेन्टिमेन्टल, रक अनि पपशैलीका ६ वटा गीत समावेश भएको उनको सो एल्बमका गीत युवामाझ चर्चित पनि भए । जसकारण उनी अहिले दोस्रो एल्बमको तयारीमा लागेकी छिन् । १७ वषर्ीया आस्थाले गायिका बनेर नाम र प्रसिद्धि कमाउने सपना देखेकी छिन् । पहिलो एल्बमबाट पाएको सफलताले गर्दा उनलाई आफ्नो सपना पूरा हुने संकेत मिलेको छ रे । बच्चैदेखि गीत गाउन भनेपछि हुरुक्क हुने उनले पाँच वर्षअघि रेकर्ड गराएको गीतसमेत समावेश गरेकी छिन् आस्थामा । तीन वर्षसम्म गायन तथा गितार वादन प्रशिक्षण लिएकी आस्था आफूले गाएको तिमी नै छौ मेरो सोचाइमा… बोलको गीतबाट इमेज म्युजिक अवार्ड २०६६ मा सर्वात्कृष्ट गायिकाको मनोनयनमा परेकी छिन् । जसकारण उनी अचेल निकै पुलकित छिन् । भन्छिन्, ‘यति धेरै सिंगरमध्ये नोमिनेसनमा पर्नु चानचुने कुरा होइन । म निकै खुसी छु ।’ सर्वात्कृष्ट गायिकाको इमेज अवार्ड जित्ने कुरामा आफू निकै आशावादी रहेको बताउँछिन् उनी । भन्छिन्, ‘म निकै आशावादी छु । पब्लिकले मेरो गीत निकै मन पराएका छन् । त्यसैले मेरो कन्फिडेन्ट बढेको छ ।’ ह्वाइटहाउस कलेजमा १२ क्लासमा अध्ययनरत आस्था पढाइ र गायनलाई सँगसँगै अघि बढाउने बताउँछिन् । ‘पढाइका कारण म्युजिक करिअरमा ब्रेक नलागोस् अनि म्युजिकका कारण पढाइमा पनि ह्याम्पर नपरोस्, त्यस्तो किसिमको सेड्युल बनाएर अघि बढेकी छु,’ उनी भन्छिन्, ‘म सिंगरका रूपमा चिनिन चाहन्छु । यसका लागि आफूलाई हरेक कुरामा पर्फेक्ट बनाइरहेकी छु ।’ आस्थाले आफ्नो एल्बमका तीनवटा म्युजिक भिडियो दर्शकमाझ ल्याइसकेकी छिन् । र, ती सबै भिडियोमा मोडलका रूपमा उनी आफैँले अभिनय गरेकी छिन् । तर, उनलाई मोडल बन्ने इच्छा छैन रे । भन्छिन, ‘एक्टिङमा हल्का इन्टे्रस्ट भएकाले आफ्नो गीतमा आफैँ मोडल बनेकी हुँ । फिल्म खेल्ने, मोडल बन्ने इच्छा छैन मेरो ।’ म्युजिक भिडियो, टेलिविज्ञापनमा अभिनय गर्नका लागि प्रस्ताव आइरहेको भए पनि आफू तयार नभएको बताउँछिन् उनी । भन्छिन्, ‘म गायनमै रम्न चाहन्छु । यसमै करिअर बनाउने ध्याउन्न छ मेरो ।’ अहिलेसम्म आफ्ना डेढ दर्जन गीत रेकर्ड भइसकेको बताउँछिन् उनी । ती गीतमध्येबाट छानेर आस्था निकालेको बताउँदै उनी भन्छिन्, ‘मैले पाँच वर्षअघि पहिलोपटक आँखामा आँसु बोलको गीत रेकर्ड गरेकी हुँ । त्यसपछि पनि थुप्रै गीत रेकर्ड गरे । तीमध्येबाट सेलेक्टेड गीत आस्थामा राखेकी हुँ ।’ अचेल उनको एल्बमको सोच न बोलको गीतको म्युजिक भिडियो टेलिभिजन च्यानलहरूमा प्रसार भइरहेको छ । प्रशन्न पौडेलको निर्देशनमा बनेको सो म्युजिक भिडियोबाट आफूले निकै राम्रो प्रतिक्रिया पाइरहेको बताउँछिन् उनी । सुदीप गिरी, नरेन लिम्बू, १९७४ एडी, निर्णय श्रेष्ठहरूका गीत मन पराउँछिन् उनी । नेपाली, अंग्रेजी, रकपप, सेन्टिमेन्टल सबै प्रकार गीत सुन्ने गरेको बताउने उनी आफूलाई फिट हुने गीतमा अफर गरे फिल्म गायनमा समेत लाग्ने सोचाइमा छिन् । भन्छिन्, ‘कसैलाई मेरो स्वर आफ्नो फिल्मको चरित्रसँग मिल्छ भन्ने लाग्छ भने म फिल्मका गीत गाउन तयार छु ।’